الخميس، 12 مارس، 2015

مليت

أنا مليت أقول حاضر ،
أقول ماشي ،
أقول أمرك ،
أنا مليت تكون أفكاري منسية عشان خاطرك ،
أنا مليت أغيب علشان تكون حاضر ،
أكون واشي ،
أكون تابع لقرارتك ،
أكون ضهرك ،
أكون عرضك ،
تكون روحي هي أرضك ،
تبعتر فيها وتمرمط حروف اسمي ،
وتكتب بالبنط العريض إني مؤسس حزب أنصارك ،
وإني الحفيظ علي أسرارك ،
وتحلف بالطلاق علي مراتي ،
وحلفانك ما يقع علي الأرض ،
وفين الأرض ؟!
مهي بقت محتلة ،
ومنحلة ،
ومسلوبة ،
ومصلوبة ،
وهي إتجاها إسلامي ،
أنا اتمردت !
لا أنا ثوري ولا تقدر تقول عليا إنساني ،
لكني مليت أكون صدي صوتك ،
أكون صورتك ،
تكون قولة رأي هي قبري ،
أكون اسطوانة مشروخة ولا يجوز تصلحني ،
أنا اللي لما تدبحني ،
تكون حررت شخصيتي ،
تكون حريتي طعنتي في ضهر سلطان جائر ،
أنا هعافر ،
تقول عني من النوع اللي بيكابر ،
تقول للناس "متتخدعوش في إسلامه" ،
ومن طايع ومن تابع أكون كافر ،
ما يمنع برضو تغييري ،
أنا مليت أقول مليت ،
أنا اكتفيت !

ليست هناك تعليقات:

إرسال تعليق