الأربعاء، 21 يناير، 2015

من بدري

_لا ، لا ، لا أنا هسكت أحسن أنا ملخبط أوي وبخرف !

_إتكلم ، علشان خاطري إتكلم ومتسكتش ، اللخبطة دي عنوان الصدق وعندي بمليون كلمة مترتبة علي مليون بيت شعر .

_بصي يا ستي ، إنتي ، إنتي تستحقي كل حاجة حلوة هنا وهناك ، تستحقي منتهي الجمال ، وأنا بقي ، وأنا مفيش بيدي حيلة !

فيه ناس محوشة لبكرة حلم يديهم سبب يحبوا الحياة علشانه ، ضحكة تلونلهم ألوانهم الباهتة من تاني ، صاحب يسندوا عليه ويأخدوا برأيه ويأخد بإيديهم  ، أو فلوس وطبعا ده الأهم  ، بس أنا محوشك إنتي بس !

 يمكن دي أنانية مني إني خليتك بكرة ، كل بكرة بالنسبة لي ، يمكن حملتك فوق طاقتك ، يمكن خوفتك  بذعري اللي كان بيبان كل ما تلمحي للمستقبل فأقولك خلينا في النهاردة ، هنا أمان أكتر طول ما إحنا برة الحدود  ،  بس إحنا جواها ومن بدري ، سلاسل العشق محاوطانا وبتضيق علينا وتوسع من بدري ،  هنغيب بكرة طيب هنحضر النهاردة بأنهي وش ؟ وﻷي سبب ؟ ﻷي قضية وبأي معني ؟ إزاي يكون النهاردة مش مجرد حلقة ؟ حلقة مش كل السلسلة ، أنا بهبل أنا عارف ، بس أنا والله كنت خايف ، وأنا والله خايف دلوقتي وأنا بقولهالك ، أنا بعشقك يا كل بكرة ، وكل النهاردة ، ومملكش أديكي غيرك ، تقبلي ؟!

_فتحضنه بقوة وتمسك في هدومه زي ما تكون بتمسك في روحه علشان متضيعهاش وتهمسله : وأنا كمان !

_إنتي كمان إيه ؟

_أنا كمان بعشقك ، وانا قبلتك زي ما إنت قبلتني ،
_بتبوسه علي خده _

من بدري .

ليست هناك تعليقات:

إرسال تعليق